0
Shares
काठमाडौं । भारतमा कोरोना संक्रमितहरु दैनिकजसो बढ्न थालेपछि त्यसको असर नेपालमा पनि देखिन थालेको छ ।
केही दिन अगाडिसम्म नेपालमा दैनिक कोरोना संक्रमित हुनेको संख्या दुई अंकमा सीमित थियो । तर, भारतमा संक्रमण बढेसँगै नेपालमा पनि दैनिक कोरोना संक्रमित हुनेको संख्या तीन अंकमा पुगेको छ ।
बुधबार मात्रै तीन हजार ९६३ जनाको नमूना परीक्षण गर्दा १४५ जनामा संक्रमण पुष्टि भएको छ ।
भारतमा कोरोना भाइरसको प्रकोप बढ्न थालेपछि रोजगारीका लागि त्यहाँ गएका नेपालीहरु स्वदेश फर्किन थालेका छन् ।
भारतबाट फर्किएका नेपालीहरुमा कोरोना भाइरसको संक्रमण समेत देखिन थालेको छ । बुधबार मात्रै कञ्चनपुरको गौरीफन्टा नाका हुँदै नेपाल भित्रिएका नेपालीमा कोरोना पुष्टि भएको थियो ।
कोरोना भाइरसको प्रकोप विकराल बन्न नदिन सरकारले पूर्व तयारी शुरु गरेको जनाइएको छ ।
जसअन्तर्गत स्वास्थ्य सुरक्षाका मापदण्डको पालनामा कडाइ गर्न थालिएको छ ।
अब सार्वजनिक स्थानमा मास्क नलगाइँ हिँड्ने तथा सामाजिक दुरी कायम नगर्नेलाई कारबाही गरिने भएको छ ।
गृह मन्त्रालयको निर्देशनानुसार देशभरका सबै जिल्ला प्रशासन कार्यालयहरुले स्वास्थ्य सुरक्षाका मापदण्ड पालनामा कडाइ गर्न थालेका हुन् ।
स्वास्थ्य सुरक्षाका मापदण्ड पालना नगर्नेलाई संक्रामक रोग २०२० बमोजिम कारबाही गरिने पनि जिल्ला प्रशासन कार्यालयहरुले चेतावनी दिएका छन् ।
भारतमा कोरोना संक्रमित हुनेको दर बढ्दै गएपछि स्वास्थ्य तथा जनसंख्या मन्त्रालयले त्यसको असर नेपालमा समेत देखिने बताएको थियो ।
स्वास्थ्य मन्त्रालयले आइतबार एक विज्ञप्ती जारी गर्दै भारतमा कोरोना भाइरस संक्रमणको दर लगातार बढिरहेकाले नेपालमा पनि संक्रमण बढ्न सक्ने अवस्थालाई दृष्टिगत गर्दै देशभर सभा, जुलुस, र्याली, भेला, जमघट, गोष्ठी, बैठक र भीडभाड हुने कार्य नगर्न/नगराउन आग्रह गरेको थियो ।
भारतमा संक्रमण बढेकाले भौतिक दूरी कायम गर्न, मास्क लगाउन, साबुनपानीले राम्रोसँग हात धुन वा स्यानिटाइजरको प्रयोग गर्न स्वास्थ्य मन्त्रालयले सबैमा अपिल गरेको थियो ।
स्वास्थ्य मन्त्रालयको विज्ञप्ती पछि गृह मन्त्रालयले कोरोना संक्रमण फैलिन नदिन सावधानी अपनाउन र स्वास्थ्य सुरक्षाका मापदण्ड पालनामा कडाइ गर्न भनेर ७७ वटै जिल्ला प्रशासन कार्यालयहरुलाई निर्देशन दिएको थियो ।
गृह मन्त्रालयले निर्देशन जारी गरेपछि देशभर नै डिस्ट्रिक कोभिड-१९ क्राइसिस म्यानेजमेन्ट सेन्टर (डीसीएमसी)को बैठक बसेको थियो ।
बैठकबाट स्वास्थ्य सुरक्षाका मापदण्ड कडाइका साथ पालना गर्ने गराउने निणर्य भएको छ ।
सबै जिल्ला प्रशासन कार्यालयहरुले चैत १५ र १६ गते हुने होली पर्व घरमै मनाउन, सार्वजनिक स्थलमा जाँदा अनिवार्य मास्कको प्रयोग गर्न, भौतिक दुरी कायम गर्न, जात्रा, पर्व, संस्कृतिहरुमा हुने भेला तथा जमघट नगर्न निर्देशन जारी गरेका छन् ।
जारी भएका निर्देशनहरुको अवज्ञा गरिए संक्रामक रोग ऐन, २०२० अनुसार कारबाही गरिने पनि चेतावनी दिइएको छ ।
प्रमुख जिल्ला अधिकारीहरुको नेतृत्वमा रहेको डीसीएमसीको बैठकले जिल्लामा रहेका स्थानीय तहहरुसँग समन्वय गरी सबै क्वारेन्टिन तथा आइसोलेसन सेन्टरहरुलाई तयारी अवस्थामा राख्ने निणर्य समेत गरेका छन् ।
यस्तै, केस अनुसन्धान तथा कन्ट्याक्ट ट्रेसिङको काम पनि आवश्यकताअनुसार अगाडि बढाइने निणर्य गरिएको छ । यस्तै, अस्पताल तथा स्वास्थ्य संस्थाहरुलाई महामारी व्यवस्थापनको आवश्यक तयारी अवस्थामा रहन लगाउने पनि डीसीएमसीको बैठकहरुले निणर्य गरेका छन् ।
कोरोना संक्रमण नियन्त्रणका लागि सरकारले लकडाउन गर्न सक्ने भन्दै केही दिन यता हल्ला समेत चल्न थालेको छ । तर, तत्काल लकडाउन जारी गर्ने कुनै तयारी नरहेको गृह मन्त्रालयका प्रवक्ता सहसचिव चक्रबहादुर बुढा बताउँछन् ।
अहिलेका लागि स्वास्थ्य सुरक्षाका मापदण्डहरुको पालनामा कडाइ गर्ने नीति रहेको बुढाले बताए । स्वास्थ्य सुरक्षाका मापदण्ड पालना नगर्ने, मास्क नलगाइ सार्वजनिक ठाउँमा जाने र अनावश्यक भिडभाड गर्नेलाई संक्रामक रोग ऐन, २०२० अनुसार कारबाही गरिने बुढा बताउँछन् ।
पछिल्ला केही दिनमा नेपालमा समेत दैनिक संक्रमित थपिने दर बढ्न थालेको छ । बुधबार मात्रै ३ हजार ९६३ जनाको नमूना परीक्षण गर्दा १४५ जनामा संक्रमण पुष्टि भएको छ । बुधबार कोरोना संक्रमणबाट एक जनाको मृत्यु भएको छ ।
नेपालमा हालसम्म २ लाख ७६ हजार ३८९ जनामा कोरोना भाइरस संक्रमणको पुष्टि भएको ।
जसमध्येका २ लाख ७२ हजार १८७ जना संक्रमण मुक्त भइसकेका छन् भने १ हजार १८२ जना सक्रिय संक्रमित छन् ।
कोरोना संक्रमणबाट हालसम्म ३ हजार २० जनाको मृत्यु भएको छ ।
