0
Shares
काठमाडौं – हुम्लाको चङ्खेली गाउँपालिकास्थित सलिसल्लामा पहिलो पटक यात्रुवाहक बस पुग्दा स्थानीयबासी खुसी भएका छन्।
भौतिक विकासमा पिछडिएका सलिसल्लामा मिनीबस पुग्दा स्थानीयबासीले बाजागाजासहित भव्य स्वागत गरेका हुन्।
स्थानीयबासीले कच्ची सडकमा बस ल्याएर सेवा दिएको भन्दै बस, चालक र सहचालकलाई फूलमालाले समेत स्वागत गरेका छन्।
जिल्लाको चङ्खेली गाउँपालिका-४ का दन्तबहादुर शाहीले गत फागुन १८ गते अदानचुली, ताँजाकोट लगायतका नागरिकलाई ल्याएर बस सुर्खेत हुँदै २० गते बाजुराको कोल्टीमा पुगेको हो।
यसभन्दाअघि हुम्ला र बाजुरामा बोलेरो जीप सञ्चालन भए पनि उक्त क्षेत्रमा पहिलो पटक ३० सिट भएको यात्रुबस पुग्दा गाउँ-गाउँमा खुसीयालीसँगै फूलमाला र अबिर जात्रासमेत गरे तर उक्त जात्रा बोलेरो जीपको एकाधिकार तोडिदिएको छ।
गत मंसिर २७ गते हुम्लाका प्रमुख जिल्ला अधिकारीको संयोजकत्वमा संघीय संसद छक्कबहादुर लामासहित जिल्लाका उच्चपदस्थको टोलीले अनुगमन गरेपछि विधिवत्रुपमा बाजुराको धुलाचौरदेखि हुम्ला सर्केगाडको बालुकुनासम्म सडक सञ्चालन गर्ने निर्णय गरेसँगै त्यसको ठिक ३० दिनपछि पुस २८ गते सार्वजनिक यातायात व्यवस्थापन समितिका अध्यक्षसमेत रहेका प्रमुख जिल्ला अधिकारी चिरञ्जीवी गिरीको अध्यक्षतामा धुलाचौरमा बसेको बैठकले यात्रुवाहक जीप १२ वटा र मालवाहक मझौला ट्रक चार वटा सञ्चालन गर्ने निर्णय गर्यो तर ठूला बस सञ्चालन गर्ने/नगर्ने निर्णय भने गरेको थिएन।
त्योसँगै धुलाचौरबाट ताँजाकोट, अदानचुली बालुकुनासम्मका लागि बाजुराका यातायात प्रालिले १२ वटा जीप सञ्चालन गर्न थाले। त्यहाँ जुन अगाडि पुग्यो उही जीपको नम्बर लाग्ने गरेपछि जीप धेरै यात्रु थोरै हुँदा जीप धुलाचौरमै एक/दुई दिन बस्न थाले।
यात्रु नपाएर जीप त बसिरहेका अवस्थामा ३० सिट भएको यात्रुवाहक बस आउँदा जीप मालिकले उक्त बसलाई पनि हामीकै नम्बरकै आधारमा हिँड्नुपर्ने नभए चल्न नदिने भन्दै धेरै दिन चल्न दिएनन्।
उता बस मालिक दन्तबहादुर शाहीले भने, ‘यात्रु भए पनि नभए पनि दैनिक दिन बस सञ्चालनमा आउने छ।’
बस सञ्चालनमा आउन थालेपछि ती जीपले यात्रु नै नपाउने भएपछि जीप मालिक मर्कामा पर्न थाले। त्यसपछि बसलाई ठप्प गर्ने निर्णय गरे त्यसभन्दापछि बसलाई चल्न दिएनन् यदि चल्ने हो भने हामीको जस्तै नम्बरका आधारमा चल्नुपर्ने भन्दै ठप्प गरे।
यता धुलाचौरमा चार वटा यातायात प्रालि सञ्चालनमा भए पनि उनीहरूले प्रतिस्पर्धाका आधारमा नभई मिलेर एकपछि अर्को जीप छुट्ने रूटिङअनुसार चल्न थालेपछि यात्रुलेसमेत सास्ती खेप्नुपर्ने बाध्यता छ।
जीप धेरै छन् एक बस पनि सञ्चालनमा छ तर पनि कोल्टीबाट आएका नागरिक बाध्य भएर धोलाचौरमा एक/दुई दिन बस्नैपर्ने बाध्यता छ।
उक्त बसलाई धुलाचौर चल्न नदिने भए पनि बस घाटामा गइरहेको छ, केही दिनअघि मात्र नेपाली सेनाले बालुकुनादेखि सलीसल्लासम्मको सडकको सामान्य बाटो खुलेपछि उक्त ३० सिट भएको यात्रुवाहक बस नेपाली सेनाले जिम्मा लिएको कर्णाली करिडोरको अन्तिम पोइन्ट सलीसल्लामा पुगेपछि त्यहाँ स्थानीय नागरिकले बाजागाजासहित स्वागत गरेका छन्।
कर्णाली प्रदेश ००६ ख ०४०२ को बस चङ्खेली गाउँपालिका– ४ का दन्तबहादुर शाहीले आफ्नै जन्म स्थानमा यात्रुवाहक बस पुर्याए पनि बस सञ्चालनमा समस्या भएको सञ्चालक शाहीले गुनासो गरे।
यसअघि गाउँमा रिजर्भ गरी साना सवारी साधन चल्ने गरेको थियो। सडक स्तरोन्नति गरेर गाउँघरलाई सहरसम्म जोड्ने प्रयास गरिएको बताइएको छ।
‘ठूलो काम त यो होइन तर सजिलो पनि छैन। पहिलो पटक यात्रुवाहक बस गाउँमा ल्याइयो अब नियमित गर्ने प्रयास गर्छौं’, शाहीले भने, ‘जनप्रतिनिधि र स्थानीयबासीको माग आएकाले बस सेवा सुचारू गरिएको छ तर बस सञ्चालनमा अहिले पनि धेरै समस्या देखिएको छ।’
