Monday 24th of June 2024

प्रदेश प्रमुख डा. अहिराजले गरे ‘जलन पीडित’ बालबालिकालाई आर्थिक सहयोग

0 Shares

जनकपुर — प्रदेश २ प्रमुख डा. राजेश अहिराजले ‘जलन पीडित’ दुई बालबालिकाको उपचारका लागि आर्थिक सहयोग गरेका छन् ।

प्रदेश प्रमुख अहिराजले पदभार ग्रहणपछिको पहिलो महिनाको पारिश्रमिक रकम (३२ हजार रुपैयाँ ) दुई जना जलन पीडित बालबालिकाहरुको उपचारका लागि सहयोग गरेका हुन् । कीर्तिपुर अस्पतालमा पुगेर उनले सो रकम हस्तान्तरण गरेका हुन् ।

विगत ७ वर्षदेखि एसिड पीडितहरुको उद्धार तथा उपचारमा सहयोग पुर्‍याउँदै आएका सामाजिक अभियन्ता उज्वल विक्रम थापाले ती बालबालिकाहरुको उपचारका लागि सहयोग गर्न आग्रह गरेपछि प्रदेश प्रमुख झाले उक्त सहयोग गरेका हुन् ।

‘प्रदेश प्रमुख झाले जनताको पैसा जनताकै सेवाका लागि खर्च गर्ने चाहना राख्नुभएको थियो, सोही बमोजिम आर्थिक सहयोग गरिएको हो,’ सामाजिक अभियन्ता थापाले भने, ‘आगोमा परी जलेका ती बालबालिकाहरुको उपचारमा सहयोग गर्नका लागि मैले सिफारिस गरेको हुँ । उनको सहयोगले बालबालिकाको उपचारमा ठूलो राहत पुग्ने विश्वास लिएको छु ।’

प्रदेश प्रमुख अहिराजले आगलागीमा परी घाइते भएकी सिन्धुलीकी गाङ्लेख–७ की २ वर्षीया बालिकाको उपचारका लागि नगद २० हजार सहयोग गरेका हुन् । बालिका वस्तुभाउका लागि पकाइएको कुँडोको भाँडोमा परेर जलेकी थिइन् ।

यसैगरी प्रदेश प्रमुख अहिराजले आगलागीमा परी घाइते बनेका वीरगंजका महानगरपालिका–६ का ३ वर्षीय बालकको उपचारका लागि १२ हजार नगद सहयोग गरेका हुन् । ती बालक घर नजिकै बच्चाहरुले फोहोर बालेको ठाउँमा परेर जलेका थिए ।

दुबै बालबालिकाको हाल कीर्तिपुरस्थित बर्न अस्पतालमा उपचार भइरहेको छ ।

प्रतिक्रिया