Thursday 20th of June 2024

‘काठमाडौंको बस्तीबीच पुष्पा कसरी जलिरहन सक्छिन् ?’

0 Shares

काठमाडौं : पुष्पा न्यौपाने मृत्यु प्रकरणमा परिवारले हत्या भएको आशंका गरेको छ। इन्गेजमेन्ट तोडिएपछि सामान फिर्ता लि केटाको घर पुगेका पुष्पाले त्यहीँ आत्मदाह गरेको बताइएको छ।

 

दरबारमार्गस्थित केल्मी ब्राण्डका शोरुम सञ्चालक पुष्पा गत आइतबार साँझ ५ बजे धुम्बाराहीमा ८० प्रतिशत जलेको अवस्थामा भेटिएकी थिइन्। जिल्ला प्रहरी परिसर काठमाडौंका प्रवक्ता दिनेशराज मैनालीले आत्महत्या गर्न दुरुत्साहन दिने २९ वर्षीय सुधन संग्रौला प्रक्राउ परेको बताए।

प्रहरी बृत महाराजगञ्जबाट खटिएको टोलीले संग्रैलालाई प्रक्राउ गरेको हो। उनीविरुद्ध मुलुकी अपराध संहिंता २०७४ को परिच्छेद १२ को आत्महत्या गर्न दुरुत्साहन दिन नहुने कसुरमा जिल्ला अदालत काठमाडौंबाट ५ दिनको म्याद थप गरी अनुसन्धान भइरहेको छ।

काठमाडौं-१० बानेश्वर बुद्धनगर बस्ने २७ वर्षीय पुष्पाको काठमाडौं-४ धुम्बाराहीका सुधनसँग गत भदौ १८ गते इन्गेजमेन्ट भएको थियो। उनीहरुबीच गत माघदेखि प्रेम सम्वन्ध रहेको बताइएको छ। प्रेमलाई विवाहमा परिणत गर्ने योजनामा रहेकी पुष्पा गत आइतबार धुम्बाराहीस्थित मधु संग्रौलाको घर अगाडि आगो लाग्दै गरेको अवस्थामा भेटिइन्। उपचारको क्रममा न्यौपानेको सोमबार बिहान कीर्तिपुर बर्न अस्पतालमा मृत्यु भयो।

घटनामा संग्लन भएको आरोपमा पीडित परिवारले ४ जनाविरुद्ध प्रहरीमा जाहेरी दिएको छ। प्रहरी बृत महाराजगञ्जमा दिइएको जाहेरीमा सुधनको परिवार नै घटनामा दोषी भएको भन्दै कारबाहीको माग गरिएको छ।

सुधनका बुबा-आमा दिनेश र बिन्दु संग्रौला, दाजु मधु संग्रौला र सुधन संगौलाविरुद्ध ज्यानसम्बन्धी कसुरको आत्महत्या दुरुत्साहन मुद्दामा जाहेरी दर्ता भएको प्रहरीले पुष्टि गरे।

‘अघिल्लो दिनसम्म माया लाग्यो भनेर रुँदै गएका सुधनका परिवारले अर्को दिन उही व्यक्ति जलिरहँदा हेरिरहन कसरी सक्यो? प्रहरीलाई खबर पनि गरेको छैन। बचाउन जाने छिमेकीलाई पनि छुन हुन्न भन्दै रोकेको छ। उनीहरू आफैँले बोलाएर प्रेटोल छर्किएको हुनसक्छ। आगो लगाएर हामीलाई खबर गरेको हुनसक्छ। बस्तीबीच कोही युवती सहयोग नै नपाएर जलिरहनु सम्भव देखिन्न।’

पुष्पाका दाजु उत्तम न्यौपानेले घटना शंकास्पद भएको भन्दै अनुसन्धानका लागि प्रहरीमा जाहेरी दिएको बताए। ‘गत भदौमा भएको इन्गेजमेन्ट तोड्नका लागि उनीहरुको परिवार नै शनिबार हामो घरमा आएका थिए। सुपारी र गरगहनासमेत फिर्ता गरेका थिए। सुधनका बुबा-आमाले छोराले गल्ती गर्‍यो भन्दै रुँदै माफीसमेत मागेका थिए। एक्कासी इन्गेजमेन्ट किन तोड्नुभएको भनेर पटक-पटक सोधेका हौं। उनीहरूले कारण केही भनेनन्। कुरा मिलेन भनेरमात्रै भने। कुरा र विचार नै नमिलेको भए किन इन्गेजमेन्ट गर्नु?,’ दाजु उत्तमले भने।

परिवारका अनुसार शनिबार इन्गेजमेन्ट टुटेपनि पुष्पा खासै दुःखी नभएको बताएको छ। ‘अर्को दिन हुने भनिएको आफन्तको विहेका लागि लुगा बनाउन पुष्पा दिउँसो ३ बजे घरबाट निस्किएकी थिइन्। साँझ साढे ६ बजेसम्म उनको फोन अन नै छ। घरमा त्यस्तो नराम्रो केही भनेकी थिइनन्। शनिबार राति सुधनको बुबाले फोन गरेको भन्दै सुनाएकी थिइन्। लुगा सिलाउन घरबाहिर गएकी उनी बुद्धनगरबाट कसरी धुम्बाराही पुगिन्? प्रेट्रोल कहाँबाट आयो?,’ उनले प्रश्न गरे।

उत्तमको अनुसार साँझ ६ बजेतिर सुधनको बुबाले पुष्पाको बुबालाई फोन गरी घरको गेट बाहिर पुष्पाजस्तै कोही केटी जलिरहेको छ भन्दै बताएका थिए। ‘पुष्पाजस्तै लागेको भए जलेको देख्दादेख्दै किन नबचाएको? प्रहरीका अनुसार मानिस पूरै जल्न २० देखि आधा घण्टा लाग्छ। यत्रो समयसम्म जलिरहँदा उनीहरूले हेरेर किन बसे?  यहाँ शंका गर्नुपर्ने प्रशस्तै आधार छन्। अघिल्लो दिनसम्म माया लाग्यो भनेर रुँदै गएका सुधनका परिवारले अर्को दिन उही व्यक्ति जलिरहँदा हेरिरहन कसरी सक्यो? प्रहरीलाई खबर पनि गरेको छैन। बचाउन जाने छिमेकीलाई पनि छुन हुन्न भन्दै रोकेको छ। उनीहरू आफैँले बोलाएर प्रेटोल छर्किएको हुनसक्छ। आगो लगाएर हामीलाई खबर गरेको हुनसक्छ। बस्तीबीच कोही युवती सहयोग नै नपाएर जलिरहनु सम्भव देखिन्न। परिवार नै मिलेर हत्या गरेको हुनसक्छ,’ उनले भने।

प्रहरीका अनुसार शरीरमा पेट्रोल खन्याएर आगो लगाएको अवस्थामा उनलाई उद्धार गरेर कीर्तिपुरस्थित बर्न सेन्टरमा पुर्‍याइएको थियो। प्रहरीमा दिएको जाहेरीमा सुधन शोरुममा आउने क्रममा पुष्पासँग गत २०७८ को माघदेखि चिनजान भएको थियो। एकअर्काबीच फोन र सामाजिक सञ्जालमा कुराकानी हुने क्रममा उनीहरू प्रेम सम्बन्धमा थिए। घरमा आउजाउ गर्ने र घुम्नसमेत जाने गरेका थिए। परिवारले प्रहरीसँग सुधन र पुष्पाबीच फेसबुक म्यासेन्जर, भाइबर र ह्वाट्स एपसहित कल डीटेल विवरण बुझेर प्रमाणको रूपमा अनुसन्धान सुरु गर्न जाहेरीमा भनिएको छ। घटनास्थलबाट ५ लिटरको खाली ग्यालेन पनि प्रहरीले बरामद गरेको छ।

प्रतिक्रिया