Sunday 16th of June 2024

धनुषामा चोरीका घटना : यस्तो छ तीन आर्थिक वर्षको तथ्याङ्क

0 Shares

धनुषा / पछिल्लो समय धनुषामा बेरोजगारी तथा लागूऔषध दुर्व्यसनीहरूको सङ्ख्या बढ्दै जान थालेपछि चोरीका घटनाहरूमा वृद्धि भएको छ ।

पछिल्ला वर्षहरूको तुलनमामा धनुषामा चोरीका घटनाहरू दोब्बरले वृद्धि भएको हो । जनकपुरधाम लगायतको स्थानमा मोबाइल चोरी, पाकेटमारी, मोटरसाइकल चोरी लगायतका घटनाहरू हुनु सामान्य जस्तै भइसकेको छ । गत आर्थिक वर्ष २०७९/८० मा धनुषामा पाँच सयभन्दा बढी चोरीका घटना भएका छन् ।

जिल्ला प्रहरी कार्यालय धनुषाका अनुसार गत आर्थिक वर्षमा ५८७ वटा चोरीका घटना भएको छ । जबकि आर्थिक वर्ष २०७८/०७९ मा २५१ र आर्थिक वर्ष २०७७/०७८ मा २४० वटा चोरीका घटना भएका थिए ।

जिल्ला प्रहरी कार्यालय धनुषाको प्रहरी नायव उपरीक्षक वेदप्रसाद गौतमले गत आर्थिक वर्षमा समेत उजुरी दिन आउनेको सङ्ख्या न्यून रहेकाले ४७४ वटा घटनामा अभद्र व्यवहार मुद्दा चलाउनुपरेको बताउनुभयो । उहाँले चोरीका घटनाहरू बढी देखिएपनि उजुरी कमै आउने गरेकाले अभद्र व्यवहारमा मुद्दा चलाउनुपर्ने जानकारी दिनुभयो । आर्थिक वर्ष २०७८/०७९मा २५१ वटा चोरीको घटना हुँदा १३३ घटनामा अभद्र व्यवहार मुद्दा र २०७७/०७८ मा २४० चोरीका घटना हुँदा १५९ घटनामा अभद्र व्यवहार मुद्दा चलाउनु परेको बताउनुभयो ।

चोरीका घटनाहरूमा अधिकांश युवाहरू सक्रिय रहेको पाइएको जिल्ला प्रहरी कार्यालय धनुषाको तथ्याङ्कले देखाउँछ । ८० प्रतिशतभन्दा बढी घटनामा २५ वर्ष मुनिका युवाहरू चोरीमा संलग्न रहेको पाइएको हो । अभिभावकले समय नदिने, अभिभावक वैदेशिक रोजगारमा गएकाहरूको सन्तान र लागूऔषध दुर्व्यसनको कुलतमा फसेका युवाहरू आफ्नो दुर्व्यसनको इच्छापूर्तीका लागि चोरी गर्ने गरेको प्रहरी नायव उपरीक्षक गौतमले बताउनुभयो ।

चोरीका घटनाहरूमा वृद्धि हुँदा जिल्ला प्रहरी कार्यालय धनुषाले चोर पक्राउ गर्ने अभियानलाई समेत तीव्र बनाएको छ । चोरीका घटनाहरूलाई निर्मूल पार्नका लागि विशेष सुरक्षा योजना बनाई प्रहरी निरीक्षकको नेतृत्वमा २५ जनाको टोली परिचालन, रातको समयमा पैदल गस्ती, एम्बुस टोली परिचालन, सिमानाकामा जाँचमा कडाइ, भिडभाड हुने ठाउँमा सादा पोसाकमा प्रहरी परिचालन गरिएको गौतमले बताउनुभयो ।

मोटरसाइकल, साइकल, हेलमेट, घरको सामग्री चोरी, धर्मशाला र मन्दिरमा चोरी तथा लुटपाट, पसलबाट नगद चोरी लगायतका घटनाहरूमा वृद्धि हुँदै गइरहेको गुनासो बढ्न थालेपछि धनुषा प्रहरीका लागि यसलाई नियन्त्रण गर्न चुनौतीको विषय बन्दै गइरहेको छ ।

प्रतिक्रिया