Sunday 16th of June 2024

भएर दर्ता रोक्का भएका छुट जग्गा पुनः दर्ता हुने

0 Shares

सरकारले रोकेको छुट जग्गा दर्ताको प्रकृया फेरि सुरु हुने भएको छ ।

छुट जग्गा दर्ता रोक्का गरेपछि सयौं निवेदनहरु मालपोत कार्यालयमा थन्किएको छ । नयाँ निवेदन दिन पनि सयौं मानिसहरु कुरिरहेका छन् । भोगचलन गरिरहेका तर दर्ता हुन नसकेका जग्गाको छुट दर्ताका लागि सरकारले फेरि मौका दिने भएको छ ।

सोमबारको मन्त्रिपरिषद् बैठकले छुट जग्गा दर्ता गर्न चाहनेका लागि दुई वर्षभित्र आवेदन दिन सूचना प्रकाशित गर्न स्विकृती दिने निर्णय गरेको छ ।

‘नाप नक्सा भएको जग्गा दर्ता गर्न छुट भएमा त्यस्तो जग्गा दर्ता गर्न चाहने सम्बन्धित जग्गावालाले सम्बन्धित मालपोत कार्यालयमा निवेदन दिने म्याद यो सूचना प्रकाशित भएको मितिले दुई वर्ष र कार्यालयमा यसअघि नै निवेदन गरी फछ्र्यौट हुन बाँकी पुराना प्रतिवेदनहरु फछ्यौंट गर्ने म्याद यो सूचना प्रकाशन भएको मितिले दुई वर्ष हुने गरी तोकिएको छ ’ पत्रकार सम्मेलनमा सञ्चार तथा सूचना प्रविधिमन्त्री रेखा शर्माले भनिन्, यसबाट जग्गा भोगचलनमा रहे पनि दर्ता हुन छुट भएकाहरु लाभान्वित हुनेछन् ।

सरकारले सूचना प्रकाशन गर्न स्वीकृती दिइसकेकाले अब चाँडै नै राजपत्रमा सूचना प्रकाशन भईं कार्यान्वयनको प्रकृयामा जाने मन्त्री शर्माले बताइन् । मालपोत नियमावली, २०३६ को नियम ४ (क) मा ‘दर्ता गर्नसम्म छुट भएका जग्गा दर्ता गर्नुपर्ने’ व्यवस्था छ । उक्त नियममा नापनक्सा भएको तर दर्ता गर्नमात्रै छुट भएको जग्गा दर्ता गर्न पाउने व्यवस्था छ ।

जग्गाको भोगचलनगर्दै आइरहेको तर नाममा दर्ता नभएका जग्गाधनीहरुले प्रमाण सहितको निवेदन दिए त्यसको आवश्यक छानबिन गरी मालपोत कार्यालयले जग्गा दर्ता गर्ने प्रकृया रहेको छ ।

विगतमा पनि छुट जग्गा दर्ता हुने गरे पनि झण्डै १० वर्ष पूर्व रोकेको थियो । सरकारले जग्गा दर्ता खुल्ला गरेपछि अनियमितता हुन सक्ने आशंका पनि गर्न थालिएको छ ।

खास गरी गुठी संस्थान र मठमन्दिरहरुको जग्गा छुटको नाममा व्यक्तीहरुले प्रमाण जुटाएर दर्ता गराउने संभावना बढेको बताइन्छ । वन क्षेत्रमा लामो समयदेखि बसोबासगर्दै आए पनि जग्गा दर्ता गराउन असफल रहेका हजारौ मानिसहरुले वनको सहमतिमा जग्गा धनी प्रमाण पुर्जा पाउने भएको बताइन्छ ।

प्रतिक्रिया