हरित अभियान अन्तर्गत ३ लाख विरुवा रोपिने चुरे संरक्षणको लागि

जनकपुरधाम : महोत्तरीमा चुरे संरक्षणको लागि हरित अभियान अन्तर्गत ३ लाख विरुवा वृक्षारोपण गरिने जनाइएको छ ।

नेकपा माओवादी केन्द्रका स्थायी सदस्य गिरिराजमणि पोखरेलले हरित अभियान सुरु गर्दै ३ लाख विरुण रोप्ने जानकारी दिएका छन् ।
आईतबार जनकपुरधाममा आयोजित पत्रकार भेटघाट कार्यक्रममा पूर्व शिक्षा विज्ञान तथा प्रविधिमन्त्री समेत रहेका पोखरेलले हरित अभियान सुरु गर्दै महोत्तरीको गौशाला, बर्दिबास र भंगहा नगरपालिकाबाट सो अभियानको सुरुवात भएको जनाए । उनले चुरे संरक्षणका लागि हरित अभियान चलाउने र पहिलो चरणमा ३ लाख विरुवा वृक्षारोपण गर्ने जानकारी दिए ।

महोत्तरीको निर्वाचन क्षेत्र नम्बर १ का प्रतिनिधिसभा सदस्य समेत रहेका पोखरेलले भने- ‘हरित अभियान सम्पूणर् मानव तथा प्रकृति बीचको स्वास्थ्य सम्बन्धलाई पुनःस्थापित गराउने पहल गरेका छौँ । यस अभियानले समुदायले भोगिरहेको विभिन्न समस्याहरुलाई क्रमागत रुपमा निर्मूल पार्न सहयोग गर्ने छ ।’

उनले यस अभियानमा आबद्ध हुन सरोकारवाला संघ, संस्था, क्लब र समूहलाई आह्वान समेत गरेका छन् ।

उनले चुरे क्षेत्रमा बढिरहेको वन विनाश, अनियन्त्रित भू-उपयोग, अव्यवस्थित विकास निर्माण तथा अत्याधिक उत्खनन जस्ता मानवीय क्रियाकलापले गर्दा चुरेको वातावरणमा निरन्तर ह्रास भएको बताए । उनले भने, ‘यसको प्रत्यक्ष असरले गर्दा तराईको उर्वर भूमिलाई मरुभूमिकरण गरिरहेको देखिन्छ ।’

हरित अभियानले पारिस्थितिक प्रणालीको पुनःस्थापना, विपद व्यवस्थापन, पारिस्थितिक प्रणालीमा आधारित कृषि, संवेदनशील क्षेत्रमा प्राकृतिक स्रोतको दोहनलाई नियन्त्रण र ज्ञान केन्द्रको अवधारणाका कार्यक्रम सञ्चालन गर्न समन्वयात्मक भूमिका निर्वाह गर्ने उनको भनाइ छ ।

अर्को प्रसंगमा उनले विकास निर्माणले केही विनास अवश्य भएपनि विकाससंगसंगै वृक्षारोपण अभियानलाई संचालन गर्नुपर्नेमा उनले जोड दिए ।

प्रतिक्रिया

सम्बन्धित समाचार