स्थानीयले गरे आफ्नै लगानीमा सडक मर्मत

गौर ः रौतहटको राजदेवी नगरपालिका वडा नम्बर ७ मा स्थानीयहरुले आफ्नो नीजि स्रोतबाट सडक मर्मत गरेका छन् ।

वर्षौदेखि हिलाम्य रहेको स्थानीय मुड्वलबादेखि राजदेवी वडा नम्बर ९ महतो टोलमा जाने सडक पटक पटक नगर प्रमुख धिरेन्द्र कुमार सिंहलाई आग्रह गर्दा मर्मत नगरेकोले लाभावान्वित हुने व्यक्तिहरुले चन्दा संकलन गरेर ग्रेभल गरि सडक संचालनमा ल्याएको हो ।

वडा नम्बर ७ र ९ लाई जोड्ने सडकको रुपमा रहेको सो बाटो करिव एक बर्षदेखि अलपत्रमा रहेको थियो । बजेट अनियमितता गर्नमा अघि रहेका राजदेवी नगरपालिकाका जनप्रतिनिधिले स्थानीयको आधारभूत आवस्यकता समेतलाइ बेवास्ता गरेको स्थानिय्हरुको आरोप रहेको छ ।

सडकमा हिलो भएर आवागमनमा असहजता भइरहेको सवैको सहयोगमा ग्रेभल गरिएको स्थानीय देवनाथ यादवले बताएका छन् । जिल्ला हुलाक कार्यालयका प्रमुख समेत रहेका यादवले जनप्रतिनिधिलाइ पटक पटक आग्रह गर्दा पनि कुनै वास्ता नगरेकोले ८० हजारको लागतमा ग्रेभल गरिएको जनाए । ४० हजार रुपैयाँ अझ खर्च गरे सडकको अवस्था राम्रो हुने उहाको भनाइ रहेको छ । सो सडक निर्माण भएमा दुवै गाउका स्थानियहरुलाई आफ्नो खेतवारीमा काम गर्न आउँन जान सहज हुने विश्वास गरिएको छ ।

नगर पालिकाले विकास निर्माणको लागि आएको रकम फिर्ता गराए तर सडक मर्मत गर्न नसक्नु दुखद भएको टिप्पणी स्थानीयको रहेको छ ।