गायत्री होटेलमा नाबालक हत्याको प्रयास ,होटेल सञ्चालक अमरनाथ गुप्ता पक्राउ

जनकपुरधाम : गायत्री कुञ्ज नामको होटेल सञ्चालन गर्ने अमरनाथ गुप्ताले छिमेकी एकजना बालकलाई मरनासन्न हुनेगरि कुटपिट गरी होटेलको लिफ्टमा बन्द गरिएको अवस्थामा स्थानीय बासिन्दाहरुले मंगलवार राती उद्धार गरेका छन् ।

मैथिली भाषा, साहित्य र नाट्य क्षेत्रका प्रख्यात कलाकार रामअशिष ठाकुर, मदन ठाकुरका भतिजा सञ्जय ठाकुरका १२ वर्षिय छोरा आदित्य ठाकुरलाई मरनासन्न हुनेगरि कुटपिटगरि होटेलको लिफ्टमा बन्द गरिएको अवस्थामा बालककी आमाले रोईकराई गरेपछि स्थानीय बासिन्दाहरुले उद्धार गरेका हुन् ।

गंभीर घाइते भएका आदित्य ठाकुरको उपचार प्रादेशिक अस्पताल जनकपुरधाममा भइरहेको छ ।उपचारमा संलग्न चिकित्सकहरुका अनुसार बच्चाको अवस्था गंभीर छ ।बच्चा अचेत अवस्थामा रहेको र शरिरको बिभिन्न भागमा चोट लागेकाले २४ घण्टापछि मात्र स्वास्थ्य अवस्थाबारे यकिन हुने चिकित्सकहरुले जनाए ।

होटेल छेउमै ठाकुरको घर रहेकोछ ।होटेल अगाडीको खाली सडकमासँधै खेलिरहने बच्चाहरुलाई गुप्ताले पटक पटक हप्काउने र कुटपिट गरेको पीडित परिवारले जनाए ।तर स्थानीय बासिन्दाहरुका अनुसार होटेलमा रक्सी बोतलको कार्टुन जस्तो राखिएकोले बच्चा गएपछि कुटपिट गरी लिफ्टमा थुनेर हत्याको प्रयास गुप्ताले गरेका हुन् ।गुप्ताले हालै एउटा ठूलो रक्सी भठ्ठी किनेको बताइन्छ ।

स्थानीय बलराम गुप्ताले जनाए अनुसार घाइते बच्चा खेलिरहेको बेला उनलाई गुप्ता समेत उनका स्टाफहरुले समातेर होटेल भित्र लगि कुटपिट गरे ।बच्चा बेहोस जस्तो भएपछि उनलाई लिप्mटमा बन्द गरिदिएपछि अन्य बच्चाहरुले हल्ला गरेपछि स्थानीय बासिन्दाहरु होटेलमा पसेर आदित्य ठाकुरलाई लिफ्टबाट बाहिर निकालेर अस्पताल पठाएका थिए ।

होटेलको ढोका भित्रबाट थुनेका गुप्तालाई स्थानीय बासिन्दाहरुले लात्तजुत्ता र मुक्कीले कुटपिट गरेर लिफ्ट सम्म पुगेका थिए ।स्थानीय बासिन्दाहरुले गुप्ता सहित उनका दुई जना कामदार रामप्रकास ठाकुर र सुभाष साहलाई पक्राउ गरिएको जिल्ला प्रहरी कार्यालय धनुषाले जनाएको छ ।

गुप्ता र होटेलका कामदार ठाकुर र साहलाई स्थानीय बासिन्दाहरुले कुटपिटगर्दै जानकी प्रहरी चौकीमा जिम्मा लगाएका थिए ।स्थानीय बासिन्दाहरुको बढदो आक्रोशलाई दृष्टिगतगरि जानकी प्रहरी चौकीले गुप्ता सहित तीनै जनालाई जिल्ला प्रहरी कार्यालय पठाएको छ ।

जिल्ला प्रहरी कार्यालयमा गुप्तालाई छुटटाउन केहि भू माफिया र सुदखोरहरु राती नै पुगेको बताइएको छ ।तर गुप्तालाई कडा भन्दा कडा कार्वाही नगरिए जानकी चोकमा बिरोध प्रदर्शन गर्ने चेतावनी स्थानीय बासिन्दाहरुले दिएका छन् ।गुप्ताले खोलेको होटेल जानकी मन्दिरको जग्गा मिचेर बनाइएको आरोप लाग्दै आएकोछ ।उपमहानगरपालिकाको मापदण्डलाई मिचेर गुप्ताले बनाएको होटेल भत्काउन कयौं पटक पत्राचार भएपनि संरचनामा झन थप निर्माण गरिएकोछ ।

शुद्ध शाकाहारीको बोर्ड लगाइएको सो होटेलमा मद्यमांस समेत चल्ने गरेको स्थानीय बासिन्दाहरुको आरोप छ ।बच्चाले रक्सीको कार्टुन हेरेपछि नै कुटपिट गरिएको स्थानीयहरुको आरोप छ ।जानकी मन्दिरमा दर्शन पुजाका लागि आउने साधुसन्तहरु शाकाहारी होटेल भन्दै बस्ने गरेका थिए ।

बच्चाको अवस्थालाई हेरेर गुप्ता लगायत पक्राउ परेकाहरुमाथि कार्वाही गरिने धनुषाका प्रहरी प्रमुख प्रकाश रानाभाटले जनाए ।नाबालिग बच्चामाथि कुटपिटगरि लिफ्टमा थुन्ने कार्य जघन्य अपराध भएकाले दोषीहरुलाई कार्वाही हुने उनले बताए । -जनकपुर टुडे

प्रतिक्रिया

सम्बन्धित समाचार