गाईको बाछी चोरेर काटेको आरोपमा तीन जना पक्राउ

बागलुङ : गोठबाट गाईको बाछी चोरेर काटेको अभियोगमा बाट प्रहरीले तीन जनालाई पक्राउ गरेको छ।

गण्डकी प्रदेश प्रहरी कार्यालयका प्रहरी वरिष्ठ उपरीक्षक मोहनप्रसाद पोखरेलका अनुसार पक्राउ पर्नेमा बागलुङको निसीखोला गाउँपालिका–६ घर भई पुरन्चौर बस्ने २८ वर्षीय असारी घर्ती, २२ वर्षीय सविन बुढामगर र २१ वर्षीया अस्मिता बुढामगर छन्।

पोखरा महानगरपालिका–१९ पुरन्चौरका केशरबहादुर अधिकारीको गोठमा बाँधेको क्रस गाईको बाछी चोरेर उनीहरुले काटेका प्रहरीले जनाएको छ। उनीहरुलाई प्रहरीले मंगलबार पक्राउ गरेको हो।

बाछी चोरी भएको खबर प्राप्त हुनासाथ खटिएको प्रहरी टोलीले उनीहरुको खोजी गरेको थियो। खोजतलासका क्रममा अधिकारीको घरबाट लगभग दुई किलोमिटर टाढा लगेर काटिरहेको स्थानबाट उनीहरुलाई पक्राउ गरिएको प्रवउ पोखरेलले जानकारी दिए।